Am Februar 2022 ass de Krich an der Ukrain mat der russescher Invasioun ugaangen.
An och haut, bal 3 Joer duerno, steet Kyiv weiderhin an der Defensiv zu engem iwwerdimensionale Géigner, dee keng Bereetschaft weist, de Konflikt bäizeleeën. D’Ënnerstëtzung vun der Ukrain gëtt an Europa villfachs zeréckgeschrauft a mat engem neie President Donald Trump zu Washington a manner wéi engem Mount stellt sech och d’Fro ëm déi militäresch Hëllef aus den USA. De Petz Bartz mat engem Réckbléck op de Krich an Europa.
2024 huet fir d’Ukrain genee esou ugefaange wéi 2023 opgehalen hat: Mat quasi permanente russeschen Attacken op zivil Ziler an op den Energiesreseau vum Land, dorënner Staudämm a Stroumzentralen. Nieft dem konventionellen Asaz vu schwéierer Artillerie gouf d’Ukrain dëst Joer awer och ëmmer méi an en Dronekrich verwéckelt.
Avidiivka a Bakhmut ware bis dato Flecken op enger Landkaart – kleng vergiessen Uertschaften am Oste vum Land, no un der Kontaktlinn zu deene schonn zanter 2014 besate Verwaltungsbezierker. Haut sinn et Nimm vu battere Schluechten, déi fir d’Ukrain verluer goungen, nodeems de Militär gezwonge war, sech ënnert Drock vun der Invasiounsmuecht zeréckzezéien. Et feelt net onbedéngt u Courage, heiansdo och ganz einfach u Munitioun.
Ënnert deene souwisou schwierege Konditiounen fir d’Ukrain, wou Russland all Woch an engem anere Kaff am Donbass de Fändel opspaant, bréckelt am Mäerz dann och nach déi moralesch Ënnerstëtzung fir Kyiv.
Poopst François:
“Ech mengen, dass deen dee Stäerksten ass, dee sech d’Situatioun ukuckt a säi Vollek an dann de Courage huet, de wäisse Fändel opzespanen an ze verhandelen. An haut kann ee verhandele mat der Ënnerstëtzung vun den internationale Muechten, an där ginn et der.”
Amplaz Verhandlungsbereetschaft zelebréiert de Kreml awer de Konflikt. Am Mäerz erënnert sech Moskau un den 10. Joresdag vun der illegaler Annexioun vun der Krim. E puer Méint drop warnt de Vladimir Putin international Journalisten zu Moskau, dass Russland och kann op säi ganzt Arsenal zeréckgräifen.
“Aus iergendenger Ursaach mengt de Westen, Russland géif ni Atomwaffen benotzen. Mir hunn eng nuklear Doktrinn, déi däitlech ënnersträicht, dass Russland am Fall vun enger Menace vu senger Souveränitéit a senger territorialer Integritéit all Mëttel asetzt, déi zur Verfügung stinn.”
Fir Moskau sinn d’Konditiounen fir e Fridde kloer: Déi 4 Verwaltungsbezierker am Osten vun der Ukrain, déi Russland illegal an deelweis besat hält, wëllt ee behalen. An d’Pläng fir e NATO-Bäitrëtt vu Kyiv musse fale gelooss ginn. Vun der Krim geet keng Rieds méi.
Keng vun deene Viraussetzungen gëtt op engem Friddenssommet an der Schwäiz am Summer ugeholl.
Kamala Harris – US-Vizepresidentin:
“Mir mussen d’Wourecht soen. Hi freet net no Verhandlungen, mee no enger Kapitulatioun.”
Ëmmer erëm gëtt Kharkiv, déi zweetgréisst ukrainesch Stad attackéiert. Ugangs August da kontert d’Ukrain mat enger iwwerraschender Offensiv an d’Regioun Kursk. Ukrainesch Militärverbänn attackéieren elo de russesche Militär op russeschem Territoire. Fir d’Verdeedegung zitt Russland allerdéngs keng Verbänn aus dem Donbass of, mee léisst Zaldoten aus Nordkorea als Mercenairen untrieden. Vill vun den Asiate kommen dobäi als Kanounefudder ëm d’Liewen. De Krich kritt doduerch awer och an der zweeter Hallschent vum Joer ee ganz aneren Dréi, eng aner Dynamik mat aneren, internationalen diplomatesche Implicatiounen.
Mark Rutte – NATO-Generalsekretär:
“Nordkoreanesch Truppen, déi a Russland géint d’Ukrain untrieden. Dat ass eng bedeitend Eskalatioun.”
De Bundeskanzler Olaf Scholz brécht iwwerdeems en Tabu a féiert en Telefonsgespréich mam Vladimir Putin. Ouni Resultat. Den Uruff ass awer op schaarf Kritik gestouss. Vläicht war Berlin an Zäite vun innepolitesche Problemer och just op der Sich no aussepolitescher Relevanz.
Fir Tango ze danzen, brauch een der zwee, seet den Donald Trump an enger Entrevue mam President Zelenskiy a mécht keen Heel aus senger spezieller Relatioun mam Vladimir Putin. Déi speziell russesch Militäraktioun wëllt hien als neie President séier op en Enn bréngen.
Um Terrain hu sech d’Arsenaler dëst Joer verbessert. D’Ukrain ass elo mat modernen US-amerikaneschen Atacms um Start a Russland test eng Oreshnik-Laangstreckerakéit iwwert der ukrainescher Stad Dnipro.
De Krich ass den Ament an enger geféierlecher Phas an eng konkret Léisung steet weiderhi net an Aussiicht. Ee vun den Haaptprotagonisten geet no 4 Joer elo an d’Pensioun. Deen aneren ass no bal 3 Joer krichsmidd, ouni villverspriechend Perspektiven.
