Ministerio Publico diahuebs a emiti su relato di casonan penal hiba dilanti mesa berde, Nan ta menciona cu en comparacion cu 2022, a tuma nota di un caida den e cantidad di sospechosonan registra den casonan di delito y ta menciona 28%.
En comparacion cu e cantidad di menornan di edad na 2022, por mira un aumento chikito di 3%, cu a haya nan mes envolvi cu husticia. Di e total di sospechosonan den casonan di delito cometi, a presenta 971 persona dilanti un fiscal.
Segun nan relato, e delitonan cu mas a tuma nota di nan den aña 2023 tabata maneha sin rijbewijs (901); maneha bou influencia (509); maltrato (447); soft drugs (255); robo of atraco (224); menasa (212); droga pisa (154); destruccion (136); inmoralidad (117); y violencia publico (81).
Den e categoria di e delitonan ariba menciona, OM a tuma nota di un aumento den e cantidad di casonan di maneha auto sin rijbewijs. E aña anterior e delito aki tabata na prome luga, pero cu menos cantidad di caso (716) y ña aña 2023 el a subi cu 26%.
Ta prome biaha tambe cu delitonan di inmoralidad ta den e top dies delitonan cu mas ta bini dilanti. E causa di esaki probablemente ta cu tin un proceso di conscientisacion den comunidad di Aruba pa haci denuncia.
Loke nan ta bisa tambe ta cu e top 5 delitonan cu ta wordo cometi door di menornan, por lo menos den aña 2023, tabata:
1.Bringamento den publico;
2.Menasa;
3.Robo haciendo uzo di violencia
4.heling;
5.destruccion
Corupcion
Den e plan anual di 2023 a pone como punto di enfoke riba “ondermijning”. Combatimento di corupcion ta pas den un enfoke eficaz pa combati criminalidad.
Den cuadro di esey a pone un lista di casonan penal cu ta relato na corupcion.
Ta trata di e delitonan:
- soborno activo (2:128/ 2:129 Sr);
- soborno pasivo ambtenaar
- Mal uzo di funcion;
- falsificacion di documento;
- estafa;
-Labamento di placa.
E cantidad di sospechosonan en comparacion cu 2022 a aumenta cu 65%. Di e 44 citacionnan (den 2022 e tabata 3), cu a traha, a yega na 18 sentencia (na 2022 e tabata 13). E resto di citacionnan mester bay Corte ainda. Den e otro casonan a dicidi pa seponeer esakinan condicionalmente.
Di e 20 sospechosonan, a cita dos pa labamento di placa. E sentencianan cu a cay, no tabata condena pa labamento di placa. Pa loke ta e ocho sospechosonan registra, tin un caso ainda cu mester tuma un decision riba dje.
Den aña 2023 tambe a pone prioridad riba combatimento di trata di hende y traficacion di hende. A haci 13 investigacion riba traficacion di hende y cual tabata concentra riba e biahenan di contrabanda cu boto for di Venezuela.
Ta papia di shete boto y a persigui e sospechosonan tambe. Den caso di cinco boto, na final no tabatin sospechoso cu a bini dilanti of no tabatin suficiente prueba pa persigui e sospechosonan. Un caso ainda ta bou investigacion.
Tabatin dos diferente boto unda tin personanan cu a perde nan bida. Den un caso tabatin un persona envolvi y den e otro ta papia di minimalmente cuater persona.
Tambe a realisa diferente investigacion riba of den e zona di prostitucion na San Nicolas. Esey a conduci na dos investigacion relaciona cu traficacion di hende, unda e meta tabata pa saca probecho financiero via un estadia legal.
Den e investigacionnan ey tabata trata principalmente di muhenan Colombiano cu tabata traha sin permiso den barnan y tabata haya luga di keda for di e sospechosonan. Den un di e casonan a investiga tambe si no ta trata di e delito di trata di hende.
Pa loke ta e delito di trata di persona, tin cuater sospechoso registra. Despues di investigacion, a cita dos di nan pa traficacion di hende y a ricibi condena tambe pa esaki. E caso contra e otro dos sosoechosonan no tin un decision final ainda.